Փորկապությունը հղիության ժամանակ. morevmankan.am

Փորկապությունը հիմնականում դիտվում է հղիության երկրորդ եռամսյակում, երբ պտուղը չափերով մեծանում է:  Բայց երբեմն լինում է և առաջին եռամսյակի առաջին շաբաթից:

Փորկապությունը հղիության վաղ շրջանում

Առաջին եռամսյակում դիտվող փորկապության պատճառը պրոգեստերոն հորմոնն է:  Այն պատասխանատու է հղիության պահպանման համար և թուլացնում է կնոջ հարթ մկանները: Արդյունքում թուլանում են նաև աղիների մկանները և առաջանում է փորկապություն:

Հղիության սկզբում տոքսիկոզը ևս կարող է փորկապություն առաջացնել: Սրտխառնոցը, սննդի ռեժիմի խախտումը վատ են անդրադառնում աղիների աշխատանքի վրա: Փսխումը վիճակը վատացնում է ջրազրկման պատճառով:

Արդյունքւմ կարող են առաջանալ հետևյալ բարդությունները.

• վատ ինքնազգացողություն, ցավ, անհարմարավետություն, գրգռվածություն,
• խանգարվում է կարևոր սննդային նյութերի, վիտամինների յուրացումը (արդյունքում պտուղը սնունդ քիչ է ստանում),
• աղիներում փոխում է նրանց նորմալ միկրոֆլորան` ախտածին միկրոբների աճի հաշվին,
• աղիներում կուտակված կիսամարս սնուդը ներծծվելով` թունավորում է օրգանիզմը:

Սննդակարգը փորկապության ժամանակ

Հղիի մոտ պետք է կարգավորել սնունդը և ավելացնել ֆիզիկական ակտիվությունը:

Սննդակարգը կախված չէ հղիության ժամկետից, միայն կարող է փոխվել սննդի ընդունման հաճախականությունը՝ փոքր բաժիններով, օրը 4-5 անգամ, ոչ ավելի` 6-7 անգամից:

Շատ կարևոր է մեծ քանակությամբ հեղուկ օգտագործելը՝ ջուր, կաթ, կոմնպոտներ՝ ոչ պակաս օրը 1,5 լիտրից:  Քաղցր և գազավորված ըմպելիքը պետք էբացառել:

Չոր միրգը (հատկապես սև սալորի և ծիրանի) ցանկալի է կոմպոտների տեսքով օգտագործել: Քաղցր մրգերը պետք է պակասեցնել:

Օգտագործել թարմ միրգ, բանջարեղեն կամ խաշած բանջարեղեն,  զգուշանալ գազեր առաջացնող սննդից (լոբի, կաղամբ և այլն):

Օգտագործել սև հաց, մուգ շիլաներ (վարսակ, հնդկաձավար և այլն): Ոչ յուղոտ միսը և ձուկը պետք է ուտել առավոտյան և ճաշի ժամերին: Ընթրիքին բավական են բանջարեղենը, մրգերը, մածունը:

Հարկ է սահմանափակել շոկոլադը, սուրճը, թունդ թեյը, ձուն, տապակած և կծու մթերքը:

Որոշ դեպքերում սննդակարգը և ֆիզիկական ակտիվությունը չեն կարգավորում վիճակը: Առաջին եռամսյակում զգուշությամբ նշանակվում են թուլացնող մոմիկներ` գլիցերինով և պապավերինով: Արդյունք չդիտվելու դեպքում նշանակվում են լակտուլոզա պարունակող պատրաստուկներ (Դյուֆալակ, Նորմազե), որոնք հղիության ժամանակ ցուցված են:

Փորկապությունը հղիության ուշ շրջանում

Սովորաբար, փորկապությունը հղիների մոտ սկսում է 20 շաբաթականից հետո, երբ արգանդն իր չափերով սեղմում է աղիներին:

Այս դեպքում ևս խորհուրդ են տրվում ճիշտ սննդակարգ, ֆիզիկական ակտիվություն, շատ հեղուկներ: Բժիշկը կարող է նշանակել Դյուֆալակ, Ֆորլաքս կամ միկրոհոգնաներ (միկրոլաքս): Այս միջոցները, սովորաբար, արդյունավետ են:

Փորկապության դեմ ժողովրդական միջոցներ

Դեղորայք նշանակելուց առաջ բժիշկները փորձում են ավելի պարզ միջոցներ առաջարկել՝ շատ մթերքներ, թուրմեր և խառնուրդներ թուլացնող ազդեցություն ունեն: Դրանք քիչ չեն և միայն մի քանիսն են արգելված հղիներին: Աղիների մկանային տոնուսը բարձրացնող միջոցները կարող են բարձրացնել և արգանդի մկանների տոնուսը: Կարող են նաև առաջացնել ալերգիաներ և կախվածություն դեղորայքից: Այդ պատճառով դրանք արգելվում են ամբողջ հղիության ընթացքում: Արգելվում են նաև լիարժեք հոգնաները:

Փորկապության կանխարգելման համար առաջարկվում են.

• առավոտյան, քաղցած, խմել մեկ բաժակ սառը ջուր,
• բազուկի հյութ, մուրաբա,
• սև սալոր` ցանկացած ձևով. չոր, կոմպոտ, մուրաբա և այլն,
• թեյի մեջ ավելացնել չոր մրգեր,
• հում կարտոֆիլի, գազարի հյութ 1:1 հարաբերակցությամբ` խառնած ջրի հետ,
• թարմ խնձորի կոմպոտ՝ առանց քաղցրացնելու,
• կտավատի սերմերի թուրմ՝ 1-2 թ գ. մեկ բաժակ եռման ջրում, խմել սերմերի հետ
• առավոտյան ուտել վարսակի փաթիլներ` եռման ջրում թրջած, սև սալորի հետ,
• տաք ջրում լուծել 1 բաժակ մեղր և խմել սոված ժամանակ,
• 1 ճ գդալ ցանկացած հացահատիկի թեփը եռման ջրով թրջել, թողնել մինչև փափկելը, խառնել մածունի հետ և օգտագործել օրը 3 անգամ, միանգամից, սոված ժամանակ:

Հարցեր, պատասխաններ, մեկնաբանություններ